من طرف ca_le_ma 14/04/09, 02:49 pmفى
ناس لما تيجى تسالها ايه اكتر عيب شايفه فى نفسك يكون الرد : انا اكتر عيب
فيا ان اللى فى قلبى على لسانى او انا اكتر عيب فيا انى بثق فى الناس
زيادة عن اللزوم.
من ضمن الردود اللى استفزتنى : انا اكتر عيب فى ان اللى فى جيبى مش ليا وما بعرفش اعز حاجة على حد حتى لو كنت محتاجها
معناه ان البيه كريم والكرم هياكل منه حتة ، طيب ماشى يا عم هنعديها بس اذا كان دة اهم عيب فيك يبقى ايه بقى اهم مميزاتك؟
واحد من الناس اللى شايف ان اكتر عيب في انه مش بيصدق الناس دى
يعنى خلاص الرشاوى خفيت من البلد ما فيش ناس كذابة وما فيش نميمة ومافيش
حد جبان وراحت فين الندالة اتبخرت؟ وغيره وغيره من العيوب الكتيرة .
اعتقد ان اللى بيسال السؤال دة واحد فاضى مش لاقى كلام يقوله
الاخطر من كدة ان اللى بيقول الكلام دة يكون مصدق نفسه ومقتنع تماما بكدةومن هنا بقولكم ان عدم الصدق مع النفس عامل من اهم عوامل تخلف الانسان .
يعنى لو انت فاضى ونفسك تسال سؤال قول للى قدامك : انت ايه اكتر عيب شايفه فيا انا؟
تقريبا كدة يبقى السؤال منطقى
ولو ان انا شايف ان احنا لازم نعرف عيوبنا كويس اوى
ونصلح من نفسنا عشان نبقى احسن وبالتالى ماحدش يعرف يمسك عليك غلط يعنى
قبل ما حد يمسكك من ايدك اللى بتوجعك اقطعها .
مين قال ان العيب حاجة وحشة
مافيش حد اتخلق ما فيه عيوب
بس البشع ان الواحد يبقى عارف عيوبه وما يحاولش يصلحها ولا حتى يحاول يستشير الناس القريبة منه ازاى يتخلص منها .
يا جماعة لازم كل واحد فينا يقعد مع نفسه ويفكر ويشوف ايه عيوبه ويحاول يصلحها لوحده ولو ما قدرش يستشير .
